იტალიის ხელისუფლებამ, ხანგრძლივი განხილვების შემდეგ, 4 მარტს საღამოს გამოსცა განკარგულება, რომლის თანახმად, ქვეყანაში დაგეგმილი ყველა სპორტული ღონისძიება, მათ შორის საფეხბურთო მატჩები, 3 აპრილამდე გულშემატკივრებისთვის დახურული იქნება. 

ამ გადაწყვეტილების მიზეზი კორონავირუსია, რომელიც იტალიაში მძვინვარებს.

შესაბამისად, ცარიელი ტრიბუნების თანხლებით ჩაივლის ამ პერიოდში სერია A-ს, იტალიის თასისა თუ ევროტურნირების ის მატჩები, რომლებიც იტალიაში უნდა გაიმართოს. 

აკრძალვა შეეხება ყველა რეგიონს, მათ შორის ისეთებსაც, სადაც ვირუსი გამოვლენილი ჯერ კიდევ არ არის. გადაწყვეტილება მას შემდეგ მიიღეს, რაც იტალიაში დაავადებულთა რიცხვმა 3000-ს გადააჭარბა, გარდაცვლილთა რიცხვმა კი 107 შეადგინა. 

განკარგულებაში ასევე მითითებულია, რომ კლუბები ვალდებულნი არიან, რეგულარულად ჩაატარონ შემოწმება, რათა დარწმუნდნენ, რომ არცერთი სპორტსმენი ან თანამშრომელი კორონავირუსით დაავადებული არ არის.

არის იმის ალბათობაც, რომ სერია A-ს 26-ე ტურის გადადებული მატჩები, მათ შორის იუვენტუსი-ინტერი, უახლოეს შაბათ-კვირას გაიმართოს, ნაცვლად 27-ე ტურის შეხვედრებისა.
скачать dle 12.1