"თუ პუტინი უკრაინას დაიპყრობს.." - ცნობილმა კალათბურთელმა ომის შესახებ ისაუბრა

NBA-ს ვარსკვლავმა, საკრამენტო კინგსის კალათბურთელმა დომანტას საბონისმა ამერიკულ მედიასთან უკრაინაში რუსეთის მიერ გაჩაღებულ ომსა და რუსეთის პრეზიდენტის განზრახვაზე ისაუბრა.

"ეს ყოველდღიურობად იქცა. უკრაინაში მეგობრები გვყავს და ეს ყველაფერი ძალიან მძიმეა. საომარი მოქმედებები უშუალოდ ჩემს სამშობლოს ჯერ არ შეხებია, თუმცა ჩვენი ექიმები ეხმარებიან მათ. ლიეტუველებმა ომის პირველ დღეებში უკრაინას დაახლოებით 10 მილიონი დოლარი შეუგროვეს. ადამიანები გზავნიან საკვებს, უკრაინიდან დევნილ ბავშვებს კი ჩვენს სკოლებში იღებენ. ყველას ეშინია, რომ თუკი რუსეთის პრეზიდენტი უკრაინას დაიპყრობს, შემდეგ ის ყოფილი სსრკ-ის მთელი ტერიტორიის დაკავებას მოინდომებს. მერე მესამე მსოფლიო ომსაც გააჩაღებს. ვცდილობთ, ყველაფერი გავაკეთოთ, რაც შეგვიძლია - თანხის გაღება იქნება ეს თუ საჭირო ნივთების მიწოდება. მაგალითად, ნიუ ორლეანის ცენტრმა იონას ვალანჩიუნასმა უკრაინაში ორი ავტომობილი გაგზავნა, მისიებში გამოსაყენებლად" - განაცხადა საბონისმა

შეგახსენებთ, რომ რუსეთი უკრაინაში 24 თებერვალს შეიჭრა და ფართომასშტაბიანი ომი დაიწყო, რასაც ათასობით ადამიანის სიცოცხლე ემსხვერპლა. რუსი აგრესორები ბომბავენ არამხოლოდ სამხედრო დანიშნულების ინფრასტრუქტურულ ობიექტებს, არამედ მათ საჰაერო იერიში საცხოვრებელ სახლებზეც მიაქვთ. ომის დაწყებიდან 2.5 მილიონზე მეტი უკრაინელი ლტოლვილად იქცა უცხოეთში.

2008 წლის აგვისტოს ომის შემდეგ, რუსეთმა აფხაზეთი და სამაჩაბლო დამოუკიდებელ რესპუბლიკებად გამოაცხადა და მათი ოკუპაცია განახორციელა. კრემლი დღემდე აკონტროლებს საქართველოს ამ ტერიტორიებს.

მსგავსი ვიდეო