2024 წელს საფრანგეთის დედაქალაქ პარიზში დაგეგმილ ოლიმპიურ თამაშებზე ძალოსნები ჩვეული 14 წონითი კატეგორიის ნაცვლაც 10-ში გამოვლენ, მათ შორის, წონის შეცვლა კი, ლაშა ტალახაძესაც მოუწევს. შესაბამისად, განულდება აქამდე არსებული ოლიმპიური რეკორდებიც.

აღნიშნული გადაწყვეტილება უზბეკეთის დედაქალაქ ტაშკენტში მსოფლიოს 2021 წლის ჩემპიონატის დასრულების შემდეგ, ძალოსნობის საერთაშორისო ფედერაციის (IWF) კონგრესზე იქნა მიღებული, საბოლოო სიტყვა კი საერთაშორისო ოლიმპიურ კომიტეტზეა (IOC). როგორც Inside the games წერს, ძალოსნები IOC-ისგან პასუხს თებერვლის ბოლოსკენ ელიან და უდიდესი ალბათობით, ის დადებითი იქნება.

შეგახსენებთ, რომ ტოკიოში ძალოსნებმა 14 მედალი გაითამაშეს: კაცებში – 61, 67, 73, 81, 96, 109 და +109 კგ-მდე წონით კატეგორიებში, ქალებში კი – 49, 55, 59, 64, 76, 87 და +87 კგ-ებში. ახალი რეგლამენტის თანახმად, საოლიმპიადე წონები ათამდე დადის. კაცები – 61, 73, 89, 102 და +102 კგ, ხოლო ქალები – 49, 59, 71, 81 და +81 კგ.

ცხადია, რომ ეს ოლიმპიური თამაშებისთვის ძალთა განლაგებას საგრძნობლად შეცვლის. ერთმანეთთან დაპირისპირება იმ ძალოსნებსაც მოუწევთ, რომლებიც ერთმანეთს ფიცარნაგზე არასდროს შეხვედრიან. მძიმე მდგომარეობაში აღმოჩნდებიან იგივე 109 კგ-ზე ნაკლები წონის სპორტსმენები, რომელთაც მეტოქედ უძლეველი ლაშა ტალახაძე ეყოლებათ.

შეგახსენებთ, რომ საქართველოს ნაკრების 28 წლის ლიდერს 2016 (+105 კგ-მდე წონით კატეგორიაში) და 2020 წლების (+109 კგ.) ოლიმპიადები აქვს მოგებული და ცხადია, რომ პარიზშიც აშკარა ფავორიტი იქნება. ამასთან, ტალახაძისგან აუცილებლად უნდა ველოდეთ ახალ ოლიმპიურ რეკორდებს უკვე ახალ წონით კატეგორიაში.

ძალოსანთა მიერ გადადგმული ნაბიჯები იქითკენაა მიმართული, რომ საერთაშორისო ასპარეზზე ამ სპორტის რეპუტაცია გადარჩეს, თუმცა, აღნიშნული გადაწყვეტილება ამას ხელს რამდენად შეუწყობს, ძნელი სათქმელია. IOC დიდი ხანია შეშფოთებულია ძალოსნობის საერთაშორისო ფედერაციის ხელმძღვანელობის მუშაობით, სადაც კორუფცია და დოპინგთან დაკავშირებული სკანდალები ხშირი მოვლენებია, ოლიმპიური კომიტეტის პრეზიდენტმა თომას ბახმა კი კრივისა და ძალოსნობის მმართველ ორგანოებს “პრობლემური ბავშვები” უწოდა.

შეგახსენებთ, რომ ძალოსნობა, კრივი და თანამედროვე ხუთჭიდი უკვე ამოიღეს 2028 წლის ზაფხულის ოლიმპიური თამაშების წინასწარი პროგრამიდან და ეს გადაწყვეტილება გაისად თებერვალში დასამტკიცებლად IOC-ის წევრებს გადაეცემათ. სამივე სახეობის მმართველებს დაახლოებით 18-თვიანი ვადა მიეცათ, რათა ლოს ანჯელესესის თამაშებისთვის ოლიმპიური სახეობის სტატუსი შეინარჩუნონ.

წყარო : POPSPORT.COMскачать dle 12.1